កិច្ចប្រជុំទ្វេភាគីស្តីពី ចំណងមិត្តភាពរវាងរដ្ឋបាលក្រុងប៉ោយប៉ែត ខេត្តបន្ទាយមានជ័យ ព្រះរាជាណាចក្រកម្ពុជា និងខណ្ឌចុងណូហ្គូ ក្រុងសេអ៊ូល សាធារណរដ្ឋកូរ៉េខាងត្បូង

66491673_1178379489007636_887608459766267904_n

កិច្ចប្រជុំនេះបានធ្វើឡើងនៅសាលាក្រុងប៉ោយប៉ែត នារសៀលថ្ងៃចន្ទ ៧កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹង ថ្ងៃទី០៨ ខែកក្កដា ឆ្នាំ២០១៩ ដោយភាគីកម្ពុជាដឹកនាំដោយលោក គាត ហ៊ុល អភិបាល នៃគណៈអភិបាលក្រុងប៉ោយប៉ែត ខេត្តបន្ទាយមានជ័យ និងភាគីសាធារណរដ្ឋកូរ៉េខាងត្បូង ដឹកនាំដោយលោក គីម យ៉ុងជូង អភិបាល នៃគណៈអភិបាលខណ្ឌចុងណូហ្គូ ក្រុងសេអ៊ូល។

កិច្ចប្រជុំទ្វេភាគីនេះ ផ្តោតសំខាន់ទៅលើ ៖
១-បង្កើនទំនាក់ទំនងជាមិត្តភាពជិតស្និទ្ធ ដោយផ្អែកទៅលើការគោរព និងផ្តល់ផលប្រយោជន៍ទៅវិញទៅមក ដើម្បីជំរុញកិច្ចសហប្រតិបត្តិការរវាងក្រុងប៉ោយប៉ែត និងខណ្ឌចុងណូហ្គូ។
២-លើកកម្ពស់ការយល់ដឹងពីគ្នា និងប្រជាពលរដ្ឋ ព្រមទាំងគាំទ្រសកម្មភាពផ្លាស់ប្តូរនៅក្នុងវិស័យដែលមានចំណាប់អារម្មណ៍រួមគ្នា ដូចជាៈ សេដ្ឋកិច្ច វប្បធម៌ សិល្បៈ កីឡា និងការអប់រំ។
៣-បង្កើនបរិយាកាសជាមិត្តភាព ដើម្បីលើកកម្ពស់កិច្ចសហប្រតិបត្តិការលើវិស័យផ្សេងៗទៀត តាមរយៈការផ្លាស់ប្តូរព័ត៌មានចំណេះដឹងដើម្បីបម្រើផលប្រយោជន៍ និងការអភិវឌ្ឍន៍នៃក្រុង និងខណ្ឌទាំងពីរ។
៤-លើកទឹកចិត្តដល់ការិយាល័យ អង្គភាពពាក់ព័ន្ធ ដើម្បីលើកកម្ពស់កិច្ចសហការនៅក្នុងតំបន់ដែលបានឯកភាពគ្នា តាមរយៈកិច្ចព្រមព្រាងដាច់ដោយឡែកពីគ្នា នៅក្នុងទម្រង់អនុស្សារណៈ នៃការយោគយល់គ្នានៅពេលចាំបាច់។
៥-ធ្វើទស្សនកិច្ចគ្នាទៅវិញទៅមក ក្នុងការផ្លាស់ប្តូរទស្សនៈ បទពិសោធន៍ ដែលជាកិច្ចការមានប្រយោជន៍រួមគ្នា ដើម្បីលើកកម្ពស់មិត្តភាព និងគាំទ្រយ៉ាងសកម្មដល់ដំណើរទស្សនកិច្ចរបស់គណៈប្រតិភូមិនមែនរដ្ឋាភិបាល ពាណិជ្ជករ និងប្រជាជនក្នុងតំបន់វប្បធម៌។
៦-ខ្លឹមសារទាំងអស់ខាងលើនេះ គឺសម្រាប់បញ្ជាក់ពីឆន្ទៈនៃការធ្វើទំនាក់ទំនងរវាងក្រុងប៉ោយប៉ែត និងខណ្ឌចុងណូហ្គូ។ អនុស្សារណៈ នៃការយោគយល់គ្នានឹងត្រូវបង្កើត ដើម្បីចុះហត្ថលេខានៅខណ្ឌចុងណូហ្គូ ក្រុងសេអ៊ូល សាធារណរដ្ឋកូរ៉េខាងត្បូង បន្ទាប់ពីទទួលបានការយល់ព្រមពី រាជរដ្ឋាភិបាល នៃព្រះរាជាណាចក្រកម្ពុជា។ 

អត្ថបទថ្មីៗ

ចំនួនអ្នកទស្សនា

ថ្ងៃនេះ​ 319 នាក់

ម្សិលមិញ 1058 នាក់

សរុប 419633 នាក់